Achieltje's weblog

Schakende, psychiatrisch verpleegkunde studerende, aan fietsen werkende halve gare die iets heeft met de mythische afstand marathon, schildpadden, tekenen, en vele dromen

25 februari 2009

Tetietatzoverris

Nu daze zehn da 't Westvlams "e bedreihde taalsoorte" is, meug ekik, als Westvlaming in erte en nieren, da nie azo mo loatn gebeuren... Vandoar, vandage gin "beschaafd Vlams", mo geweun, Westvlams... Voe den een en den andern nie teegn z'n skenen te skippen, zitn der e bitje klanken in van overal, want ja, nen tsjoolder gelik dak zien, khoren ik e bitje vanalles... Kgoan der ook de top tiene van Radijo twéé in foefeln. Schone geamballeerd in e vertelliengsje.

Ké mien passeden weke ingeschreven voe die lange loopkoersen in Luxemburh en een aan den anderen kant van uus eigen land, in Visé, wit wel, langs die grote voart da ze do lign èn. Alhoewel, te nis gin voart, nu dak et bepeinse, mo 't is nu nog eki geliek, ossje derin springt, ist zeste nat zien of in e voart... 't zien eigenlijk mo de truntekoesn die dervan zoen zagen ot da nu e voart is, ja of nint.

Van bachten de competoeter zien de betoalingen in orde gekomn, dus z'én under geld, en ik kriegn tons m'n numero ak do toekomme. 't Woare thopen da we met die numero goed aan de mete geraken en dak me onder boane goed gejeund goan èn.

Mo gow, nu da we helegans inheschreevn zien, is 't er gin boane mi were. Kgoan zelfs mjeer zeggen, in de weke voo Luxemburh, zien we up congée payé, up e smete van do, in de dardennen... Gin gezever ot gepasserd is va slichte benen en ol, tied henoeh voe te rustn, of voe andersche "alternatieve" trainiengn te doen, gelik da 't vrouwtje noh e wrikkelgat is, ze hoat nie meugen met eur buuketetje bloot loopn, of de ruste is gepassird...

En ondertuschn zienk an de fiesiek aan 't werkn, ké ol e poar keer hoed heloopn, kmoeste ginne sjetten boai nie mi andoen, want 't is a goe were eigentlik feitelik voe achter stroate te tsjolen. Ké ook ol met de velo hereedn, en kweetnie oe hard up e pluume goan klopn en al. Nie voe te stoefn, mo gow, kzien hoed erbegost, kmoetn nu nog vuloedn vaneigenst, mo da komt wel in orde. Kvoeln mien al e stik meer in forme, dus da goat in de sacoche komn.

Neh, tefeite goak ier nog e rondleidinge geven a m'n leroare van d'avondschole, en derachter goak verzekerst nog e ki m'n loopsluffers uit de kasse hoaln, en e ferme trot luopn. Kmoetn vanaht noh goan werkn ook, in Bèèrnem, wit wel, 't zottekot da ze zehn, mo de klopt eigentlik nie, 't is "pieshiatriche klinieke" of etwukn zuks da ze zehn, 't is nog eki geliek, 't zien ol roare wietewoais die do luopn... En we meugn ze noh stoffoasje geevn da we wiln, 't bluuvn der do toch tefrente wo da we mo kun van zehn: 't is ne swoateloare...


Vwala, tetietatzoverris da we were kun goan lopekoerse doen.

't amusement nog e manjes

Achieltje

Labels: , , ,

4 Opmerkingen:

  • At 7:23 p.m., Blogger RunningRonald zei…

    eh.. sorry.. ik kom de volgende keer wel weer even terug.. dit is niet te volgen :)

     
  • At 11:47 a.m., Anonymous Koen zei…

    èmo joeng toch ... kekun nondedju wel nie mee doen zekers in Vise en Luxemburh ... kmoetn achtur me toog stoan ... doe mo mee van Wevelgem no Deinze wok, tonne zieme makoor nog eki!

     
  • At 8:39 a.m., Anonymous geert zei…

    enkel 't woord 'alternatieve' heb 'k niet gesnapt ... da westvloams toch hé ...

     
  • At 12:57 p.m., Anonymous Marc zei…

    Nu weet ik waarom het West-Vlaams met uitsterven bedreigd is.

     

Een reactie plaatsen

<< Naar de weblog